Ishin vetëm një hap larg kualifikimit për në Botërorin “FIFA2026”, ku u ndalën në fazën finale të “play-off”, në atë humbje 1-0 përballë Turqisë, por në radhët e Kosovës e kanë lënë pas atë eliminim të hidhur pasi “dardanen” shohin përpara, me trajnerin Franco Foda që vendos objektivat e radhës. Në vigjilje të dy testeve miqësorë kundër Republikës Çeke dhe Andorrës, Franco Foda mban ambientin të karikuar duke u shprehur qartë dhe pastër se tani përfaqësuesja që ai drejton synon që për herë të parë në histori të kualifikohet për në Evropian:
“Sigurisht që nuk ka qenë e lehtë humbja në finale kundër Turqisë, por duhet të shikojmë përpara dhe të përqendrohemi në të ardhmen. Ndeshjet miqësore do të na shërbejnë si përgatitje për ndeshjet e Ligës së Kombeve. Qëllimi afatshkurtër është të qëndrojmë në Ligën B, ndërsa qëllimi afatgjatë është të kalojmë në Ligën A. Gjithsesi objektivi kryesor mbetet kualifikimi në Kampionatin Evropian. Do të punojmë shumë në vazhdim për ta arritur këtë qëllim”, u shpreh Foda.
Në këto dy teste miqësore, ajo që bie në sy, është fakti që trajneri Foda duhet të bëjë llogaritë pa disa lojtarë shumë të rëndësishëm ku pjesa më e madhe kanë zgjedhur të qëndrojë pushim. Në këto dy teste nuk do të jenë në dispozicion të ekipit përfaqësues Vedat Muriqi, kapiteni Amir Rrahmani, Edon Zhegrova, e shumë të tjerë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
