Debati në Turqi, në lidhje me të ardhmen e Enrest Muçit, merr një kthesë të fortë. Nuk ka më asnjë dyshim që Trabzonspor do të ushtrojë të drejtën për të blerë kartonin e sulmuesit kuqezi, e ka bërë të qartë trajneri i ekipit, me këtë të fundit që po shtyn drejtuesit e klubit të paguajnë 8,5 milionë euro në arkën e Beshiktash për të bërë për vetë yllin kuqezi. Ky konsiderohet një investim i sigurt, si në aspektin sportiv, ashtu edhe financiarë.
Muçi është kthyer në kryefjalë në Turqi ku deri në këtë pikë të sezonit ka shënuar 12 gola dhe ka dhuruar 5 asiste, lojtari me rendimentin më të mirë në radhët e Trabzonspor. Gjithsesi për të trazuar trajnerin Fatih Tekke kanë menduar mediat në Turqi, me këta të fundit që shkruajnë se në fundjavë, në derbin përballë Fenerbahce në stadium do të këtë vizitorë nga Anglia ku në monitorin do të jetë pikërisht sulmuesi shqiptar.
Mediat në Turqi nuk bëjnë të ditur emrin e klubeve të interesuara për Muçin, por emisarë nga ishulli do të jenë të pranishëm në Stamboll. Në fakt, kjo nuk është hera e parë që ekipe angleze shfaqin interesim për Muçin, e kanë bërë edhe më herët ku sulmuesi kuqezi ishte pjesë e Legia-s së Varshavës.
Mbetet për t’u parë se si do të shkojë derbi i Stambollit dhe rrjedhimisht e ardhmja e Muçit, por fakt është se ish sulmuesi i Tiranës është pa diskutim legjionari më në formë këtë periudhë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
