Kryetari i Grupit Parlamentar të PD-së, Gazment Bardhi ka zhvilluar një takim me emigrantët e diasporës në Athinë.
Ai shprehet se votat e diasporës janë momenti më i rëndësishëm historik në këto 34 vite, pasi sipas tij vendoset fati i Shqipërisë.
Ndër të tjera Bardhi është shprehur se kush guxon të kërcënojë familjarët për heqjen e tyre nga puna, do të përballen me drejtësinë dhe do të shkojnë në burg. Deputeti deklaron se familjarëve të emigrantëve u është bërë presion nga qeveria, se nëse nuk votojnë do të hiqen nga puna.
Deklarata e plotë:
“Vota e diasporës është momenti më i rëndësishëm historik në këto 34 vite. Kemi bërë një hap përpara që secili prej jush të votojë aty ku jeton dhe punon. Kjo ju bën pjesë të rëndësishme të asaj se cfarë ndodh në Shqipëri. Kjo ju bën të vendosni për fatin e Shqipërisë.
Ju siguroj për një gjë, secili prej tyre që guxon të kërcënojë familjarët tuaj në Shqipëri se do ti heqin nga puna në këmbim të detyrimit të votës të secilit prej jush do të përballët me drejtësinë dhe do shkojnë në burg. Një dyzinë ministrash dhe deputetësh kanë pushtuar Athinën, Greqinë dhe qytetet kryesore ku janë shqiptarët, duke u bërë presion përmes të afërmeve të tyre që jetojnë mes vështirësive në Shqipëri. Por jam i sigurt që ata kanë gjetur një mur përpara dhe do çajnë vetëm kokën e tyre”.
