Një 21-vjeçar është gjetur i pajetë në ambientet e Mitropolisë në Gjirokastër, ndërsa rrethanat e vdekjes së tij mbeten ende të paqarta.
I ndjeri, një i ri nga Myzeqeja, ishte jetim dhe ishte rritur në Qendrën e Kujdesit në Shën Vlash, Durrës. Ai ishte student i Fakultetit të Teologjisë në Akademinë “Logos” në Durrës dhe kishte ardhur në Gjirokastër për një vizitë në vendin ku kishte përfunduar shkollën e mesme.
Autoritetet lokale po hetojnë shkaqet e kësaj ngjarjeje tragjike, ndërsa trupi i të riut është dërguar për ekspertizë mjeko-ligjore.
Ngjarja ka tronditur komunitetin lokal dhe ata që e njihnin 21-vjeçarin, duke lënë shumë pikëpyetje mbi rrethanat e vdekjes së tij.
NJOFTIMI I POLICISE
Më datë 16.01.2025, rreth orës 09:55, në tualetet e konviktit të një shkolle private, në lagjen “11 Janari”, është gjetur pa shenja jete dhe pa shenja dhune, shtetasi S. Sh., 21 vjeç, banues në Durrës. Nga veprimet e para hetimore dyshohet se ka humbur jetën si pasojë e mbidozës së ilaçeve që 21 vjeçari merrte për shkak të depresionit. Grupi hetimor nën drejtimin e Prokurorisë po punon për sqarimin e rrethanave dhe shkakut të humbjes së jetës.
