Përfaqësuesi i PS-së në grupin e dialogut për votën e Diasporës, Damian Gjiknuri foli për mediat pas përfundimit të mbledhjes.
Gjiknuri kërkoi votim klasik, me postë. Ai tha se Posta Shqiptare ka një sistem të besueshëm dhe mund të dërgohen fletët e votimit pa asnjë problem.
“U konsultuam dhe me ekspertë të instutucioneve të tjera, nëse shkohet drejt votimit elektronik është çështje tjetër. Por në distancë, bëhet pak e vështirë. Varianti më i mundshëm mbetet ai klasik. Çdo qytetar shqiptar që jeton jashtë vendit, nëpërmjet një sistemi të besueshëm postar do të mund të votojë. Përgjithësisht kërkesat e diasporës kanë qenë për sistemin postar. Opozita gjithmonë kërkon një shtet paralel kur vjen puna te zgjedhjet. Ne i besojmë Postës Shqiptare apo e-Albania. Sistemi i Postës Shqiptare është i besueshëm, megjithatë do ta bisedojmë. Votimi në distancë me platformë, është një gjë që duhet parë. Nëse emigrantët votojnë në mënyrë elektronike, atëherë e njëjta gjë duhet të ndodhë edhe me shqiptarët brenda vendit”, u shpreh ai.
Sa i përket propozimit për votë të ndërthurur postare dhe elektronike, përfaqësuesi i PS-së pretendon se është diskriminim. Ai deklaroi se edhe qytetarët e Shqipërisë mund të mos kenë mundësi të dalin nga shtëpia.
“Mund të jenë mbi 50 mijë shqiptarë që nuk kanë mundësi të dalin nga shtëpia dhe pse mos të votojnë ata me një sistem elektronik. Elementin e votës në distancë duhet t’ua mundësojmë të gjithëve, nëse e pranon ODIHR-i. Do duhet pak kohë dhe konsultime. Por PS, është me parimin shfrytëzo më të mirën e asaj që ke. Kemi filluar kontaktet me diasporën, na shërbejnë për ngritjen e strukturave në diasporë dhe angazhimin e tyre në votime”, theksoi Gjiknuri.
