Saraqinishti, është një nga zonat rurale më me potencial turistik në Gjirokastër, por prej vitesh ndotja është në nivele alarmane. Prej mungesës së koshave të mbeturinave, përrenjtë e fshatit që ndodhet pranë qytetit antik të Antigonesë janë tejmbushur me mbeturina. Pedagogu Vasil Bakuli, i cili banon në këtë fshat thotë për ABC se pushteti vendor duhet të marrë masa sa më parë. Kjo zonë me dhjetëra kulte fetare, monumente kulture vizitohet nga shumë turistë. Këto ditë janë kthyer nga emigracioni dhe disa banorë për pushime. Një prej tyre ndjen keqardhje kur sheh kaq shumë mbeturina.
“Unë jetoj në Greqi dhe ky është viti i katërt rresht që unë vij në fshat për të takuar të afërmit e mi, konkretisht gjyshërit. Unë personalisht ndihem shumë keq kur kaloj rrugës së kroit dhe shikoj që kjo zonë e gjelberuar ështe e mbushur me plehra dhe mbeturina. Nuk është aspak e këndshme vizualisht dhe kjo gjendje nuk i leverdis as brezave të rinj që do të vijnë më vonë”, thotë ai.
Banori kritikon pushtetin vendor dhe i kërkon që fshatin mos e lërë pas dore.
“Mendoj se kjo situatë nuk i leverdis askujt madje sugjeroj të kryhen ndryshime rrënjesore në fshatin tonë, ku bashkia duhet të jetë në krye të kësaj nisme. Aty ku jetoj nuk kemi parë apo ndeshur asnjëherë një pamje të tillë, sepse nga institucionet janë vendosur kosha, kjo duhet të ndodhë edhe këtu, pasi do të minimizonte ndjeshëm ndotjen e ambientit”, thotë ai.