Shumica e bizneseve në Gjirokastër kanë pezulluar përkohësisht aktivitetin e tyre në kuadër të masave për parandalimin e përhapjes së koronavirusit. Lokalet më të frekuentuara në qytet iu përgjigjën menjëherë thirrjes së qeverisë pa u miratuar ende vendimi. Sigurisht që kjo është pozitive dhe kontribuon në frenimin e përhapjes së Covid-19 edhe pse deri më tani në Gjirokastër s’ka asnjë rast të konfirmuar me virusin e rrezikshëm. Por ka edhe biznese të vegjël, kryesisht bar-kafe nëpër lagje që nuk janë mbyllur.
Më së shumti qëndrojnë hapur për inerci, jo se kanë njerëz që i frekuentojnë. Në mënyrë të habitshme Inspektoriati Shëndetësor Shtetëror në Gjirokastër i ka gjobitur me 100 mijë lekë të reja për shkak se nuk kanë respektuar distancën e tavolinave dhe karrigeve. Pamjet janë transmetuar edhe në media si arritje e madhe apo ushtrim me zell i detyrës që të ngarkon ligji. Nuk e vëmë në dyshim vendosmërinë e ISHSH për të kontribuar në luftën me koronavirusin, por a është kjo qasja e duhur ndaj biznesit në këtë situatë?
Pse duhet ngarkuar biznesi me gjoba në një kohë kur nuk gjenerojnë të ardhura? A e merr kush parasysh faktin se për periudhën që do të vazhdojë kjo situatë, do të thotë humbje për biznesin?Ato pak bar-kafe që mund të kenë mbetur hapur për inerci, nuk kanë sot klientë, nuk arkëtojnë para. ISHSH Gjirokastër më mirë t’i detyrojë me polici të mbyllen sesa t’i ngarkojë me gjoba. Me çfarë parash do të paguhen gjobat kur tashmë ata s’kanë punë? Apo t’i apelojnë nëpër gjykata dhe të paguajnë më pas ryshfet tek ndonjë gjyqtar KÇK? Gjirokastra është zbrazur vitet e fundit.
Ata pak njerëz që jetojnë këtu dhe bëjnë biznes duhen përkrahur, nuk duhen ndjekur me gjoba e masa të tjera represive. Natyrisht që s’jemi duke përkrahur paligjshmërinë dhe kurrë s’bëhemi palë me abuzuesit, por kjo situatë e pazakontë kërkon një qasje më miqësore karshi biznesit. Kollaj fare t’u vendosësh gjoba, të bësh foto e video dhe pastaj t’i shpërndash në media si triumf të shtetit ligjor. Në përfundim të kësaj emergjence, qeveria duhet të ketë patjetër një plan për t’i dhënë frymëmarrje biznesit. Gjobat si këto në Gjirokastër nuk zgjidhin asgjë, përkundrazi rëndojnë biznesin dhe krijojnë një klimë që dekurajon çdo iniciativë private.
©argjiroja.net
