Ndryshimi i sallës ku zhvillon zakonisht mbledhjet Këshilli Bashkiak i Gjirokastrës ka sjellë edhe kërkesa e vendime të reja nga grupimi PD-LSI. Kështu, ata kanë shkarkuar sekretarin e këshillit, Semi Golemi, i cili ishte në atë post si përfaqësues i PS-së që prej korrikut 2015. Në vend të tij emëruan Spartak Drasën, ish-drejtorin e Monumenteve në Gjirokastër gjatë qeverisjes së PD-së. Nga ana tjetër, PD-LSI tentuan të shkarkonin edhe dy këshilltarët e të PS-së nga Këshilli i Qarkut; Armand Hila dhe Shkëlqim Guçe. Synimi i tyre është që të çojnë në Këshillin e Qarkut përfaqësues të tyre, për të ndryshuar balancat dhe më pas të marrin drejtimin e këtij institucioni. Shkarkimi i Semi Golemit, si dhe kërkesa për shkarkimin e Armand Hilës e Shkëlqim Guçes u kundërshtuan nga PS edhe sepse ato nuk ishin fare të përfshira në rendin e ditës, i cili ishte bërë publik më përpara.
© ArgjiroLajm.net
