Prefekti i Gjirokastrës, Astrit Aliaj zhvilloi sot një takim me një grup gazetarësh në kuadër të nismës ‘Java e tokës’ dhe aksionit të pastrimit të mbetjeve urbane. Gjatë bashkëbisedimit ai kërkoi bashkëpunim me mediat, në mënyrë që ato jo thjesht të raportojnë, por edhe të bëhen pjesë e zgjidhjes duke ofruar rekomandime çështje të ndryshme. Më poshtë pjesë nga fjala e tij para gazetarëve.
“Pra, ne duam të themi që s’kemi probleme. Por probleme ka dhe ne jemi të ndërgjegjshëm. Nuk është problemi vetëm që ne të trajtojmë probleme e të themi, është ky problemi apo është ai. Edhe drejtuesve që unë bashkëpunoj u them vazhdimisht, jepni edhe rekomandim, jo vetëm problem. Pra, çfarë rekomandon? Se në fund të fundit kjo është edhe ajo që kërkon qytetari, qyteti, qarku. Në fund të fundit ne duhet t’i paraprijmë problemit, të mos e lëmë sa të na ndodhë një operacion, ta çojmë deri te doktori. Edhe në ato që juve fokusoheni, të jenë pjesë e asaj pune që duhet të ndërtojmë në çdo institucion. Nuk kemi Shqipëri të ndotur, por kemi Shqipëri të papastër. Pra, duhet bërë dallimi midis ndotjes dhe papastërtisë. Papastërtia është mbeturina, që mund t’i heqim dhe kaq. Por s’kemi ndotje si shumë shtete të tjera, që kanë fabrika e kanë industri. Por ky aksion duhet shoqëruar edhe me masa të tjera”, u shpreh prefekti Astrit Aliaj.
©ArgjiroLajm.net