Opozita do të zhvillojë nesër protestën përballë Kryeministrisë, për të kërkuar largimin e ministrit Fatmir Xhafaj. Simpatizantë të LSI-së dhe PD-së do të nisen herët në mëngjes edhe nga Gjirokastra me autobusë dhe autovetura. Ndonëse palët tentojnë në çdo rast t’i fryjnë shifrat e pjesëmarrësve, numri ka për të qenë i njëjtë si me protesta të tjera të ngjashme që ka bërë opozita. Shumë prej atyre që vijnë si mbështetës të LSI-së janë të punësuar në Bashkinë Gjirokastër apo ndërmarrjet në varësi të saj.
S’do shumë mend që me urdhër direkt të Zamira Ramit dhe nga frika për vendin e punës, ata do të udhëtojnë me autobusat e vënë në dispozicion te ‘Ura e Lumit’. Udhëtim i cili zakonisht është falas. Paguan partia apo njerëz pranë saj, kryesisht biznesmenë. Edhe PD do të mbledhë mbështetësit e vet dhe njerëzit e strukturave për të udhëtuar drejt kryeqytetit. Ndoshta mund të ketë edhe organizim të përbashkët kur vjen puna te transporti. Për shembull udhëtim me të njëjtët autobusë. Aq më tepër tani që të dy palët janë në koalicion, sikundër deklaroi një ditë më parë kreu i PD Gjirokastër, Roland Bejko.
© ArgjiroLajm.net
