Gjirokastra njësoj si shumë qytete të tjera të vendit nuk e ka një kinema. Salla e ish kinemasë së vjetër përdoret më shumë për takime partiake apo organizime të tjera të ngjashme. Shqetësimin ia ngriti kryeministrit Edi Rama një gazetare gjatë vizitës që shefi i qeverisë pati në Gjirokastër disa ditë më parë. Por kryeministri në përgjigjen e tij la të kuptohet që diçka e tillë duhet kërkuar te bashkia, jo tek qeveria.
“Teoriksiht dhe praktikisht do ishte mirë që të kemi. Shteti nuk ndërton kinema por i ndërton sipërmarrja. Ka një rënie kinemaje dhe në vendet shumë të zhvilluara. Nuk është diçka që mund të ndërtojë shteti. Nuk i bën qeveria këto gjëra, se qeveria nuk është komunë nuk është bashki. E gjithë kjo është çështje fondesh dhe projektesh”, u shpreh Rama duke e adresuar shqetësimin e gazetares te kryebashkiakja Zamira Rami.
Ndërkohë së fundi Bashkia Gjirokastër njofton për aktivitetin ‘Open Cinema’ nga datat 28-31 korrik, event që sipas njoftimit do të zhvillohet ‘nën kujdesin e veçantë të kryebashkiakes Zamira Rami’. Por evente të tilla janë thjesht të momentit, pasi nuk përmbushin dot nevojën e Gjirokastrës për një kinema funksionale përgjatë gjithë vitit. Bashkia Gjirokastër s’e ka ende një projekt të tillë dhe me gjasë nuk është as në prioritetet e punës së saj.
© AgjiroLajm.net