Krahina e njohur Zagori në Greqi është përfshirë në listën e pasurive të trashëgimisë botërore të UNESCO-s. Lajmin e njofton ministrja greke e Kulturës, Lina Mendoni, pas vendimit në sesionin e 46-të të Komitetit të Trashëgimisë Botërore në Riad.
“UNESCO njohu vlerën e spikatur universale të arkitekturës së Zagorisë, si një shembull i shkëlqyer i mbijetesës dhe ndërveprimit të arkitekturës bizantine dhe osmane. Ajo njohu origjinalitetin dhe integritetin e pronës. Ky vendim është një ftesë dhe dhe detyrim i vendit tonë për të ruajtur dhe mbrojtur këtë trashëgimi të paprishur, natyrore dhe kulturore, e cila nga sot bëhet globale”, tha ministrja greke e Kulturës.
Zona e Zagorit përfshin një sërë vendbanimesh me arkitekturë të shkëlqyer tradicionale, të lidhura me njëra-tjetrën nga një rrjet unik shtigjesh dhe urash të shtruara me gurë, të cilat mbahen në gjendje shumë të mirë. Vendbanimet, të cilat përfshijnë shtëpi të mëdha ose më të vogla, kisha të zbukuruara me afreske unike, shkolla të ndjekura nga breza të zagoritëve, morën formën e tyre të veçantë arkitekturore aktuale gjatë shekujve 18 dhe 19. ©argjiroja.net