Kupa e Botës 1974 kishte shumë risi, por njëra prej tyre ka të bëjë edhe me faktin se për herë të parë, një futbollist dilte pozitiv me doping. Bëhet fjalë për yllin e Kombëtares së Haitit, Ernst Zhan-Zhosef, i cili kishte përdorur substanca stimuluese për forcën fizike.
Në fakt, ngërçi tjetër ishte se ende nuk kishte një ligj që përcaktonte se cilat do ishin ndëshkimet për futbollistët që përdornin substanca dopuese. Komisioni i FIFA-s vendosi që ta dënojë vetëm duke e përjashtuar nga kompeticioni i Kupës së Botës, duke i hequr të drejtën që të jetë i disponueshëm për ndeshjet e ardhshme të Kombëtares së tij. Këtu filloi edhe makthi për 26-vjeçarin.
Dy ditë pas ndeshjes së tij të parë dhe njëkohësisht të fundit në Botëror, ai u mor me dhunë nga hoteli ku qëndronte, prej forcave të sigurisë së diktatori haitian, Papa Dok. Ata e çuan në një rezidencë sekrete dhe e rrahën në mënyrë barbare në Myhnih. Disa ditë më vonë u nis për në vendlindje, por edhe pse kishte dëmtime fizike nga tortura, gjithçka nuk kishte përfunduar. Për shkak se kishte prishur imazhin e vendit, ai u dënua me dy vjet në një kamp pune.
Pikërisht atje ai u torturua sërish, këtë herë akoma më rëndë, ku qëndroi për disa muaj i shtruar në spital, në gjendje të rëndë. Ernst ZhanZhosef e pësoi keq për shkak të përdorimit të atyre substancave, edhe pse ai gjithmonë kishte deklaruar se nuk e dinte ta kishte bërë vetë një gjë të tillë. Në fakt, vazhdimi i jetës së tij është disi paradoksale. Pasi i shleu dy vitet e dënimit, vetë regjimi që e kishte torturuar, u mundua ta rikthejë në formë të mirë fizike, pasi u duhej në eliminatore. Dhe ashtu ndodhi, pasi ZhanZhosef ishte sërish pjesë e Kombëtares së Haitit, si në eliminatoret e Kupës së Botës Argjentinë 1978, ashtu edhe në ato të Botërorit Spanjë 1982.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
