Hyri në e-Albania me të dhënat e të afërmes dhe mori mikrokredi, niset hetimi për 32-vjeçaren

Një 32-vjeçare nga Tirana është marrë nën hetim nga Policia e Tiranës pasi është denoncuar nga një 25-vjeçare, e afërme e saj, për falsifikim dhe mashtrim.
Donika Curri dyshohet se ka përdorur të dhënat personale të së resë, si dhe foton e kartës së identitetit të saj, duke ndërhyrë në e-Albania dhe më pas ka aplikuar në një bankë mikrokredish.
Sipas denoncimit të 25-vjeçares, Donika Currit, iu është aprovuar kredia në emrin e 25-vjeçares në vlerën 3500 euro. Burime nga policia bëjnë me dije se Donika Curri ka mundur të skanojë fytyrën e 25-vjeçares nga karta e identitetit, duke marrë më pas të dhënat në e-Albania.
Kjo nuk është hera e parë që emri i saj lidhet me veprime të tilla. Rezulton se më 26 qershor të këtij viti, ajo është ndaluar nga Policia e Lezhës për po të njëjtat akuza.
Curri prezantohej si përfaqësuese e një shoqate bamirësie për nëna me fëmijë të mitur, dhe u kërkonte personave të ndryshëm fotokopje të kartës së identitetit me premtimin e ndihmës mujore.
Sipas policisë, shumat që kishte përvetësuar kanë qenë deri në 5 mijë euro. Më pas, ajo përdorte këto të dhëna për të përfituar kredi në institucione financiare. Operacioni i qershorit erdhi pas 16 kallëzimeve nga qytetare të prekur nga skema e mashtrimit.
Gjatë kontrollit u sekuestruan dokumente bankare që tregonin transfertat e parave të përfituara, të derdhura në një llogari të administruar nga e dyshuara.