Një pilot shqiptar është ndaluar nga autoritetet franceze pasi dyshohet se fluturoi me një avion të lehtë mbi centralin bërthamor të Penly, në Normandi, në një lartësi më të ulët se ajo e lejuar.
Sipas gazetës franceze Le Journal du Dimanche (JDD), avioni u diktua nga autoritetet dhe u shoqërua nga Forcat Ajrore Franceze deri në aeroportin e Albertit. Pas uljes, piloti u arrestua dhe u mor në pyetje.
Gazeta raporton se profili i tij ngjalli dyshime te hetuesit për shkak të precedentëve penalë në Francë dhe Shqipëri. Gjatë kontrollit, atij iu gjetën edhe tri pajisje AirTag.
Sipas JDD-së, itinerari i fluturimit dhe shpjegimet e dhëna nga piloti u konsideruan të paqarta, ndaj autoritetet franceze nuk kanë përjashtuar asnjë pistë hetimi.
Piloti është gjobitur për shkeljen e rregullave të fluturimit, ndërsa çështja u është referuar strukturave kompetente franceze për hetime të mëtejshme.
JDD e identifikon të ndaluarin si Ermal Beqiraj, biznesmenin shqiptar të shpallur në kërkim nga SPAK në kuadër të dosjes së AKSHI-t.
Megjithatë, deri tani nuk ka një konfirmim zyrtar nga autoritetet franceze apo shqiptare për identitetin e pilotit dhe as për nisjen e ndonjë procedure ekstradimi drejt Shqipërisë.
