Një 44-vjeçare nga Polonia, e cila jeton në Rodos të Greqisë, ka denoncuar një 28-vjeçar shqiptar për mashtrim dhe kërcënim.
Sipas mediave greke, gruaja pretendon se i riu e ka bindur t’i jepte më shumë se 15 mijë euro gjatë viteve 2023 dhe 2024. Në kallëzimin e saj, 44-vjeçarja deklaron se 28-vjeçari i ka dhënë informacione të rreme dhe pretendime që nuk përputheshin me realitetin.
Në bazë të këtyre pretendimeve, ajo i ka dhënë atij para në disa këste. Shuma totale e paguar, sipas denoncimit, arrin në 15,417 euro.
Ajo thot gjithashtu se më vonë ka kuptuar se ishte mashtruar dhe i kërkoi 28-vjeçarit t’i kthente paratë. Por, sipas saj, situata mori një tjetër drejtim, pasi i riu dyshohet se e ka kërcënuar, duke i thënë se do tu dërgonte fëmijëve të saj foto nudo.
E frikësuar nga kërcënimet, 44-vjeçarja iu drejtua autoriteteve policore dhe bëri kallëzim për mashtrimin financiar dhe kërcënimet që pretendon se kishte marrë.
Ndërkohë, hetuesit pritet të verifikojnë mënyrën se si janë kryer pagesat, rrethanat e transferimit të shumës prej 15,417 eurosh dhe nëse ka prova që mbështesin pretendimet e gruas për kërcënimet.
