Ibrahimovic: Ndjehem ende lider, unë drejtoj dhe ekipi më ndjek

I kthyer së fundmi nga dëmtimi që e mbajti larg për më shumë se një muaj, Zlatan Ibrahimovic donte të tregonte pak për veten e tij në një intervistë të gjatë me Corriere dello Sport, në numrin e saj të sotëm. Shumë tema të mbuluara, e tashmja dhe e ardhmja; nga ndjenjat personale tek ato të ekipit.
Suedezi fillon nga roli i tij aktual brenda Milanit, me një përgjegjësi të caktuar që vetëm dikush si Zlatan mund ta marrë përsipër: Sot ndjehem një lider. Unë drejtoj, ekipi më ndjek. Dhjetë vjet më parë ishte një tjetër Milan. Por, edhe Milani që gjeta në vitin 2020 ishte ndryshe, një ekip shumë i ri. Ne kemi punuar, kemi sakrifikuar veten. Rezultatet? Nuk janë vetëm meritë e imja. Unë nuk mund të gjykoj se çfarë ishte atje para meje. Ne po bëjmë gjëra të mëdha, është e vërtetë, por ende nuk kemi fituar asgjë. Ekziston dëshira për të bërë më shumë. Unë dua të marr më të mirën nga vetja dhe ekipi, çdo ditë, përfshirë trajnimin.
Qëllimi minimal në këtë pikë, nga i pari në renditje, do të ishte kualifikimi për në Ligën e Kampionëve, sezonin e ardhshëm. Dhe Ibrahimovic thjesht nuk mund të shpjegojë shtatë vitet e Djallit pa Europën: Me gjithë respektin e duhur, unë shihja Atalantën në Ligën e Kampionëve dhe Milanin jo. Erdha që ta ndryshoj këtë situatë. Unë nuk e di se çfarë ka ndodhur për shtatë vite. Më duket e qartë që, nëse nuk ka stabilitet në klub, nuk mund të ketë të tillë as në fushe. Biseda me Gazidis? Gjatë bllokimit prej pandemisë ishim të gjithë në shtëpi, asgjë nuk u bë. Pastaj u kthyem, i gjithë ekipi kërkoi siguri, por përgjigje nuk mori asnjë. Unë shkova t’i kërkoj drejtorit çfarë pritet të ndodhë. Vetëm me konfirmimin e Piolit, situata është pastruar. Dhe ai ka treguar se është një trajner i shkëlqyeshëm i ekipit.
Pa sekrete, Zlatan Ibrahimovic, i cili në fakt flet me zemër të hapur për të ardhmen e tij si futbollist: Për sa kohë që jam në rregull, do të vazhdoj përpara. Kontrata ime skadon në qershor dhe ne do të flasim për të. Unë nuk doja të fusja veten në qorrsokak, as të bllokoja klubin tim. Kjo është arsyeja pse nënshkrova për gjashtë muaj pas mbërritjes dhe pastaj rinovova. Të tjerët arsyetuan ndryshe. Unë jam për lirinë e zgjedhjes.