Dinamo ka nisur ditën e djeshme përgatitjet për ndeshjen e radhës në “Final 4” ku përballë do të ketë Elbasanin në datën 24 maj, në takimin e planifikuar që të luhet në stadiumin “Air Albania”. Ashtu si ndaj Vllaznisë, edhe në këtë takim Dinamo do të jetë me mungesa të shumta megjithëse ka pasur disa rikuperime me peshë si në mbrojtje, ashtu edhe në mesfushë.
Fakti që Dinamo ka edhe disa ditë deri në ndeshje, i lejon që të rikuperojë edhe të tjerë lojtarë edhe pse me dyshim janë shumë prej tyre, pas stërvitjes së parë.
NË DYSHIM- Andre Teikseira është rikthyer në stërvitje me grupin megjithatë nuk ka marrë ngarkesë të plotë duke qenë se nuk është në gjendjen më të mirë fizike. Mbrojtësi portugez u dëmtua në gjysmëfinalen e Kupës duke humbur disa sfida, ndërkohë që në dyshim mbetet edhe Bruno Dita. Kapiteni i bluve luajti me injeksione në ndeshjen e fundit dhe gjatë këtyre ditëve, i është nënshtruar fizioterapive për të qenë gati dhe nuk pritet të jetë në 100%-shin e tij edhe pse gjendja do të vlerësohet ditët e ardhshme.
MUNGESAT- Krahu i majtë e shqetëson më shumë Dajën duke qenë se si Faton Neziri, ashtu edhe Lorran janë dëmtuar dhe nuk janë stërvitur këto ditë. Dy mbrojtësit e krahut do të jenë mungesa të sigurta në takimin e radhës ndaj Elbasanit, çka do ta detyrojë Dajën që të improvizojë në këtë takim. Dinamo ka mbrojtës të majtë edhe Naser Alijin por mbrojtësi i Kombëtares ka qenë prej kohësh në rolin e qendërmbrojtësit dhe me mungesën e Ditës e Teikseirës, mungojnë edhe alternativat në qendër, aty ku pritet dyshja Beqja-Aliji sërish.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
