Kryeministri Edi Rama do t’u drejtohet nesër shqiptarëve me një mesazh nga salla e shtypit në Aeroportin Ndërkombëtar “Nënë Tereza”, pas kthimit të tij nga vizita në Shtetet e Bashkuara të Amerikës.
Rama ndodhet prej ditësh në SHBA, ku mori pjesë në punimet e Asamblesë së Përgjithshme të Kombeve të Bashkuara dhe zhvilloi takime gjatë qëndrimit të tij në Nju Jork.
Sipas njoftimit, orari i saktë i adresimit të kryeministrit do të bëhet i ditur nesër paradite.
Nisja e Ramës nga aeroporti JFK i Nju Jorkut ende nuk është konfirmuar për shkak të kushteve të këqija atmosferike, ndaj edhe ora e mbërritjes në Shqipëri mbetet për t’u përcaktuar.
Kryeministri pritet t’u drejtohet qytetarëve menjëherë pas kthimit në vend.
