Ish-deputeti socialist, Alket Hyseni, ka komentuar në emisionin ‘Kjo Javë’, arrestimin e kryebashiakut të Tiranës, Erion Veliaj, duke e cilësuar si një masë ekstreme për një person që ka marrë vullnetin e qytetarëve për të qenë nikoqir i këtij qyteti të madh.
Ai shton se Veliaj është shembulli i punës dhe i transformimit të Tiranës, ndërsa shtoi se duhet trajtuar me dinjitet.
Alket Hyseni: Nuk prezumoj se mund të flas me kompetencë të plotë, por me atë që është bërë publike, ndjej keqardhje që arrihet në një masë ekstreme për një personalitet të jetës publike dhe aq më tepër një person që ka marrë vullnetin e qytetarëve të Tiranës për të qenë nikoqir i këtij qyteti të madh.
Nga ana profesionale, akuzat janë akuza. Këtu në Shqipëri kanë filluar që gjyqet të bëhen publike, dënimet jepen që në momentin që ngrihen akuza. Organet e akuzës shpesh herë bëhen pjesë e lojës politike, e këtij kontaminimi të jetës shoqërore. Marrin protagonizëm të pavend dhe ndërhynë në rastin konkret brutalisht në fushatën elektorale me këtë veprim.
Erionin e njoh, nuk e kam mik të ngushtë, por është personalitet i rëndësishëm i PS. Është shembull i punës, i transformimit të kryeqytetit, që nuk meriton asnjë shans të tillë. Çdo akuzë ndaj tij duhet të trajtohet si një qytetar normal, ashtu siç aktet ndërkombëtare dhe aktet shqiptare që Shqipëria i ka përafruar me aktet e OKB, trajtim me dinjitet.
Me çfarë mase duhej të ishte Veliaj, me akuzat që ngre SPAK?
Hyseni: SPAK, i suportuar me të gjithë energjitë, ka filluar të punojë, por ndoshta zelli i madh, konkurrimi i madh brenda radhëve të veta, po i çon drejt vendimeve të gabuara. Vendime të gabuara që kanë të bëjnë me disa parime që nuk janë të sotme.
Nuk dua të paragjykoj elementë të dosjes, por nuk është me vend fare kur një çështje ndaj një qytetari mund të hetohet në gjendje të lirë. Kërkesat të bëra për masa arresti janë tre herë më të larta se vendet e Europës.
Sot në sistemin tonë, 6 në 10 veta që janë në burgje, janë të padënuar.
Masa e arrestit, është masa e fundit ekstreme. Të njëjtën gjë mendoj edhe për Metën edhe Berishën.
