Koço Kokëdhima ka reaguar pasi Edi Rama ka lajmëruar përjashtimin e deputetit Gjetan Gjetani nga PS. Duke u nisur edhe nga rasti i tij, Kokëdhima është solidarizuar me deputetin Gjetani, duke thënë se Rama është kthyer në padrinon e PS-së.
“Ai “shkarkoi” sot në mbledhjen e asamblesë deputetin e qarkut të Lezhës Gjetan Gjetani, pasi kritikoi punën e dobët të Policisë së Shtetit në Kurbin dhe bëri thirrje për protesta të popullit që në zonë të rikthehet rendi dhe siguria.
Veprime të tilla nuk duhet të habisin askënd. Ai është shndërruar në padrinon e mafias që e mban në pushtet. Rilindja e ka uzurpuar partinë më të madhe të të majtës, e ka kapur për fyti dhe e ka eliminuar demokracinë e brendshme në PS. Forumet ekzistojnë vetëm në letër. Ato nuk marrin asnjë vendim kolegjial, nuk bëjnë asnjë shqyrtim dhe janë te nënshtruara plotësisht. Ato thjesht “noterizojnë” vendimet që merr kryetari, pa pyetur për norma statutore, rregullore të brendshme, vendime të grupit parlamentar, apo të kryesisë së partisë.
ZGJIDHJA e quan të turpshëm dhe te papranueshëm veprimin e kryemafiozit te vendit ndaj një deputeti të popullit, i cili e ka për detyrim që të gjendet pranë njerëzve që i kanë besuar mandatin. Thirrjet e tij për protestë popullore ndaj policisë së paaftë vendore, duhet të ishin dëgjuar me kujdes dhe të ishin reflektuar me masa të menjëhershme që Kurbinit t’i rikthehet normaliteti dhe policia vendore të bëjë detyrën qe nuk e bën.
ZGJIDHJA u bën thirrje te gjithë socialistëve, por sidomos figurave që refuzojnë t’i nënshtrohen mafies që të reagojnë! Socialistë të ndershëm, distancohuni nga kryemafiozi shqiptar”, shkruan Kokëdhima
