Një ish-zyrtar i policisë së Tepelenës dërgohet në gjyq nga Prokuroria për Krime të Rënda bashkë me një grup kriminal të akuzuar për kultivim lëndësh narkotike në sasi të mëdha.
Gani Abazi ish-shefi i rendit në policinë lokale është dërguar në gjyq në të njëjtën dosje me shtetasit Besim Zyka dhe Festim Rona dhe Pëllumb Rona.
Ata akuzohen se kanë kryer vepra penale, kultivim i bimëve narkotike në bashkëpunim në formën e grupit të strukturuar kriminal, pjesëmarrje në grupim të strukturuar kriminal dhe kryerje të veprave penale nga organizata kriminale.
Në datën 7 dhjetor 2017 pritet që në gjykatë të zhvillohet seanca e parë e këtij procesi ku 4 të pandehurit akuzohen për ngjarjen e ndodhur në 15 nëntor 2016, kur policia e Gjirokastrës arrestoi 4 persona, pasi në operacionin antidrogë ishte bërë sekuestrimi i 1772 kg kanabis dhe një armë zjarri.
Sipas Prokurorisë kanë qenë përgjimet telefonike të kultivuesve të drogës që kanë nxjerrë në pah implikimin e ish-zyrtarit të policisë.
