Deputeti demokrat Tritan Shehu ka qenë në studion e News24 në rubrikën “Opinion” për të folur për situatën politike dhe brenda Partisë Demokratike. Ai tha se brenda PD-së është bërë një analizë e gjerë ku janë nxjerrë si problemet e brendshme ashtu edhe ato për fushatën elektorale.
Për sa i përket bashkimit të opozitës në zgjedhjet vendore, Shehu tha sa kohë për të vendosur.
“Ka kohë për të diskutuar si do shkojë opozita, ka kohë për të gjykuar. Ka kohë për të vendosur format e bashkëpunimit. Shqipëria rrezikon të bjerë në diktaturën e krimit. PD është duke zhvilluar një luftë politike aktive edhe në media. Unë jam i bindur që nuk do humbë asnjë palë zgjedhje të tjera. Kam bindjen se do t’i fitojë. PD do dalë shumë mirë në zgjedhjet e ardhshme”, tha Shehu.
Kujtojmë se Shehu ka qenë në krye të dy fushatave të PD-së në Qarkun Gjirokastër dhe i ka humbur të dyja. Humbi në zgjedhjet lokale të vitit 2015, humbi edhe në zgjedhjet e vitit 2017. Mbetet për t’u parë nëse ai do të udhëheqë sërish edhe fushatën e vitit 2019.
