Njësoj si Presidenti Ilir Meta, edhe ish-deputeti i LSI-së në Gjirokastër, Vangjel Tavo, është i shqetësuar për largimin e të rinjve nga Shqipëria. Teksa ka shpërndarë lajmin e një ankete të “Friedrich Ebert”, sipas së cilës 40% e të rinjve duan të ikin nga Shqipëria, Vangjel Tavo shkruan:
“Rinia jonë, zemra dhe energjia e vendit po largohet. Fatkeqësi për një komb, tragjedi për të ardhmen. Rinia jonë meriton të jetë evropiane me mundësi dhe aspirata të shumta dhe jo të detyrohet të largohet larg familjes dhe vendit për shkak të shuarjes së shpresës. Duhet kthyer shpresa. Duhet mbrojtur e ardhmja”, shkruan Tavo duke “harruar” ai është po aq fajtor sa e gjithë klasa politike në Shqipëri për largimin e të rinjve.
Të mos harrojmë se Tavo ka në politikë mbi 20 vjet. Nëse ai dhe të ngjashmit e tij, në të gjitha partitë politike, do të ishin sjellë ndryshe me Shqipërinë, sot nuk do të kishte fare ‘hemoragji’ largimesh të të rinjve.
©argjiroja.net
