Prokuroria e Gjirokastrës ka nisur një verifikim të dokumentacionit për mbledhjen e firmave nga kandidati i Nismës Thurje në Bashkinë Dropull, Kostas Garos. Organi i akuzës është vënë në lëvizje pas denoncimit të një banori të Dropullit, i cili pretendon se nuk e ka nënshkruar dokumentin për t’i dhënë aprovimin kandidatit që paraqiti kërkesën për regjistrim në KZAZ-në 82. Kjo e fundit e refuzoi një ditë më parë Kostas Garos, me pretendimin se kishte mangësi në dokumentacion dhe se disa prej firmave ishin të dyshimta.
Në total ai kishte dorëzuar 215 nënshkrime. Argjirolajm.net siguron më poshtë deklaratën e banorit të Dropullit, i cili ka bërë kallëzim në Prokurorinë e Gjirokastrës. Për të mos dëmtuar hetimin, ne nuk po e publikojmë identitetin e tij. Në deklaratë ai pretendon se nuk e ka hedhur firmën në formular për kryetar bashkie, por kartën ia kërkoi një person me emrin Jani Papa nga Jorgucati, kundrejt premtimit se do të marrë një shumë parash.
Nuk dihet se çfarë vendimi do të marrë organi i akuzës. Por nëse falsifikimi i firmave rezulton i vërtetë, Kostas Garos rrezikon jo vetëm mosregjistrimin në zgjedhje, por ndoshta edhe të ketë pasoja ligjore. Nga ana tejtër, Nisma Thurrje pritet që vendimin e refuzimit të KZAZ-së së Dropullit, ta paraqesë te Komisioneri Qëndror i Zgjedhjeve, Ilirjan Celibashi, i cili do duhet të marrë një vendim tjetër.
Dropulli është e vetmja bashki ku Nisma Thurje ka një kandidat për kryetar bashkie. Në njësitë e tjera vendore kjo forcë politike do të kandidojë vetëm për këshillat bashkiakë. Kostas Garos në zgjedhjet e vitit 2021 ishte kandidat i PS-së për deputet në Dropull. ©argjiroja.net
