Kandidati i pavarur Gjergji Mërkuri në një reagim të parë pas regjistrimit si kandidat shprehet se Saranda është një qytet që nuk mund t’u përkas atyre që e shohin si plaçkë për ta grabitur.
Statusi i Gjergj Mërkuri:
Të dashur bashkëqytetarë, pas një beteje ligjore dhe makinacioneve të shumta të pushtetit për të ndaluar kandidimin tim në zgjedhjet lokale, ne arritëm të shënojmë fitoren e parë. Komisioni i Ankesave dhe Sanksioneve vendosi me një vendim unanim që unë të jem zyrtarisht kandidat për Bashkinë e Sarandës.
Falenderoj nga zemra të gjithë ata firmëtarë që pavarësisht presioneve i dhanë frymë kauzës tonë të përbashkët. Një falenderim të veçantë dhe për të gjitha mesazhet pozitive që kanë ardhur në adresën time përmes rrjeteve sociale.
Tashmë është koha që ne të shënojmë fitoren e dytë, të gjithë bashkë, por kësaj here jo për mua por për qytetin. Saranda është një qytet që nuk mund t’u përkas atyre që e shohin si plaçkë për ta grabitur, por as atyre që e shohin si plaçkën e munguar gjatë kohës që nuk kanë qenë në pushtet.
Saranda është e banorëve të të gjithë komuniteteve që jetojnë dhe kontribuojnë në zhvillimin e saj. Në këtë betejë kam vendosur të hyj për njerëzit dhe jo për partitë politike, për t’i dhënë Sarandës dinjitetin e munguar. Le të shkojmë për fitoren e dytë të gjithë bashkë, shkruan Gjergj Mërkuri.
