Ndërsa Mbretëria e Bashkuar i ka mbyllur dyert reperit kontrovers Kanye West, Italia duket se për momentin po mban qëndrimin e saj të hapur, pavarësisht polemikave të shumta që e shoqërojnë artistin.
West, i njohur tashmë edhe me emrin Ye, pritet të performojë më 18 korrik në Reggio Emilia, në kuadër të Festivalit Hellwatt. Ndërkohë, një koncert i planifikuar më 10 korrik në Britani është anuluar pasi autoritetet britanike i refuzuan vizën, duke mos i lejuar hyrjen në vend.
Organizatorët italianë kanë konfirmuar se data në Itali mbetet e vlefshme. Themeluesi dhe drejtori artistik i festivalit, Victor Yari Milani, theksoi se eventi synon të jetë një hapësirë për shprehje të lirë artistike dhe për bashkimin e njerëzve përmes muzikës.
“Ne jemi të lumtur ta kemi Kanye West në Reggio Emilia për një performancë që premton të jetë unike. Megjithatë, i kemi kërkuar që të kërkojë falje edhe në Itali,” u shpreh ai, duke nënvizuar se vlerat e festivalit mbeten respekti dhe përfshirja.
Megjithatë, prania e artistit ka ndezur reagime të forta në Itali. Organizata të ndryshme, përfshirë Shoqatën Kombëtare të Partizanëve (ANPI), sindikatat dhe figura publike, kanë kërkuar anulimin e koncertit, duke theksuar se deklaratat e mëparshme të West janë të papranueshme.
Reperi ka qenë shpesh në qendër të kritikave për komente raciste dhe antisemite, si dhe për deklarata dhe veprime që kanë shkaktuar reagim të gjerë publik. Këto polemika i kanë kushtuar atij jo vetëm humbjen e një pjese të fansave, por edhe ndërprerjen e disa marrëveshjeve të rëndësishme biznesi.
Në përpjekje për të përmirësuar imazhin, në fillim të vitit 2026 West publikoi një deklaratë në Wall Street Journal, ku kërkoi falje dhe shpjegoi se po trajtohej për probleme shëndetësore, duke përmendur një episod të rënduar psikologjik.
Pavarësisht kësaj, debatet nuk janë shuar. Edhe pse mbi 68 mijë bileta janë shitur tashmë për koncertin në Reggio Emilia, presioni publik për anulimin e tij vazhdon të rritet.
Festivali Hellwatt, ku përveç West pritet të performojnë edhe emra të mëdhenj si Travis Scott, Martin Garrix, Wiz Khalifa, Rita Ora dhe Swedish House Mafia, synon të pozicionohet si një nga eventet më të mëdha muzikore në Europë.
Megjithatë, mbetet për t’u parë nëse polemikat në rritje do të ndikojnë në zhvillimin e koncertit dhe në datat e tjera të turneut evropian të artistit.
