Largimi i Vasil Shkurtajt nga Luftëtari ka lënë një boshllëk të madh në radhët e skuadrës gjirokastrite e cila po mundohet që të sigurojë sa më shpejt një sulmues për pjesën e mbetur të sezonit, pasi alternativa e vetme që ka Mezani për repartin e avancuar është Ismail Dunga.
Me sa duket, gjirokastritet kanë hedhur sytë nga tregu ballkanas dhe sipas RTSH kanë piketuar dy emra sulmuesish nga kampionatet e rajonit, me të cilët janë në bisedime. Mezani kërkon një prej këtyre dy futbollistëve sa më parë që të jetë e mundur, që të planifikoje sa më shpejt pjesën e mbetur të sezonit. Edhe faza përgatitore ndërkohë i është kthyer paksa normalitetit me pushimin e reshjeve të dëborës, ndonëse ekipi vazhdon të stërvitet në kushte atmosferike aspak normale si pajoë e temperaturave të ulëta.
Burimet pranë klubit kanë bërë të ditur se lojtarëve kanë filluar t’u paguhen detyrimet e prapambetura dhe në klub shpresohet që deri në rifillimin e aktiviteteve, situata të jetë normalizuar në këtë aspekt duke bërë që futbollistët të jenë të përqendruar vetëm në fushën e lojës.
