I njohur ndryshe si “Eskobari i Ballkanit”, Klement Balili, i cili u dënua me 10 vite burg në fillim të këtij muaji, ka kërkuar lirinë në Gjykatën e Apelit. Sipas avokatëve, ai nuk ka lidhje me trafikun e drogës. Ata janë shprehur gjithashtu se prokuroria nuk ka prova për të vërtetuar akuzat.
Pritet hedhja e shortit për të përcaktuar trupin gjykues në Apel dhe seancën e parë. Në Shkallë të Parë, mbrojtja e Balilit pretendoi se numri i telefonit që prokuroria thotë se është i tij, në të vërtetë nuk vërtetohet që i përket Balilit.
Për rrjedhojë, tha mbrojtja edhe personi që del në përgjime nuk është Klement Balili. Ndërkohë për numrin e pasaportës, avokati tha se dikush e ka dërguar qëllimisht për të implikuar klientin e tij.
Pavarësisht këtyre pretendimeve, treshja gjykuese në Shkallë të Parë e quajti fajtor Balilin për akuzat e ngritura nga Prokuroria dhe e dënoi atë me 10 vite burg. Balili u dënua për trafikimin e rreth 678 kilogramë kanabis, pastrim parash, mosdeklarim të pasurisë dhe fshehje të pasurisë.
