Një mbledhje e Asamblesë së Partisë Socialiste në qarkun e Gjirokastrës, e planifikuar si një takim rutinë në ambientet e teatrit të qytetit ka marrë një kthesë të fortë, duke u shndërruar në një përballje me tone të larta.
Sipas burimeve nga brenda mbledhjes, kryeministri Edi Rama ka shprehur kritika të forta ndaj Peçit, duke e akuzuar për përfshirje në prapaskena dhe përhapje informacioni të pavërtetë në qark. Gjithashtu, ai ka ngritur shqetësime për sulmet ndaj kryebashkiakut të Gjirokastrës, Flamur Golemi, sidomos pas inskenimit të lajmit të rremë të infektimit të tij me HIV/AIDS.
Në fokus të kritikave ka qenë edhe situata në Tepelenë dhe Përmet, ku Rama ka theksuar se roli i Peçit është bërë pengesë për funksionimin normal të strukturave dhe bashkëpunimin lokal, duke përmendur edhe ndikimin e rrethit të tij të afërt në administratë.
Një nga momentet më të tensionuara, ishte përballja direkte mes tyre, ku Peçi ka tentuar të ulë tensionet me tone pajtuese, duke u shprehur: “Komandant, unë jam ushtari yt!”, por kjo nuk ka ndikuar në zbutjen e qëndrimit të kryeministrit, i cili ka vijuar me kritika të drejtpërdrejta ndaj tij.
