Ish-efektivi i policisë Arjan Tase do të qëndrojë në qeli, të paktën deri në fund të hetimeve. Më 5 gusht, Gjykata e Vlorës caktoi për të masën e sigurisë “Arrest me burg”, por ish-komisari nuk e ka ankimuar në apel vendimin.
Arjan Tase, së fundmi me detyrë shef i policimit në komunitet në Elbasan, teksa ngiste një gomone në plazhin e Potamit aksidentoi për vdekje 7-vjeçaren, Jonada Avdia.
Akuza që është ngritur mbi Tasen është ajo e vrasjes me dashje indirekte, pasi ai hyri me mjetin lundrues në një zonë të palejuar. Me akuzën e ngritur nga organi i akuzës, Tase rrezikon nga 10-20 vite burg ndërsa avokati i tij nuk pranoi të komendoi mbi kualifikimin e veprës penale.
Ishte Prokuroria e Vlorës ajo që ndryshoi akuzën e vrasjes nga pakujdesia të cilën e kishte referuar Agjencia për Mbikëqyrjen Policore, duke ngritur atë të vrasjes me dashje.
