POLICIA E SHTETIT
Specialistët për Hetimin e Krimeve Ekonomiko-Financiare në Drejtorinë Vendore të Policisë Gjirokastër, në bashkëpunim me Agjencinë e Administrimit të Pasurive të Sekuestruara dhe të Konfiskuara, kanë ekzekutuar një vendim gjyqësor për konfiskimin e disa pasurive në qytet.
Bëhet fjalë për vendimin e datës 15.04.2026 të Gjykatës së Gjirokastrës, në bazë të të cilit janë konfiskuar tre pasuri me sipërfaqe totale 154.2 m². Këto prona rezultojnë në pronësi të shtetasit K. B., 45 vjeç, banues në fshatin Valare, Gjirokastër.
Sipas burimeve zyrtare, pasuritë dyshohet se janë përfituar nga veprimtari kriminale, ndërsa konfiskimi i tyre vjen në kuadër të goditjes së pasurive me origjinë të paligjshme dhe forcimit të luftës kundër krimit ekonomik-financiar.
Operacioni u zhvillua në bashkëpunim institucional dhe në zbatim të plotë të vendimit të gjykatës, ndërsa autoritetet bëjnë me dije se do të vijojnë hetimet dhe verifikimet për raste të tjera të ngjashme.
