Veç Tërmet Peçit në Tepelenë, Mirela Kumbaro ka konfirmuar edhe Alma Hoxhën si kandidate të PS-së për Bashkinë Përmet në zgjedhjet e 14 majit. Gjatë një takimi me strukturat drejtuese të socialistëve në këtë qytet, Kumbaro njofton vendimin që pason diskutimet në Asamblenë e PS, propozimet e Organizatave Socialiste dhe rezultatet e sondazheve të brendshme.
“Kemi një super kryetare dhe kandidate si Alma Hoxha. Fitoren e kemi të garantuar sepse jemi të gjithë në punë”, shprehet ndër të tjera Kumbaro.
Alma Hoxha garon për një mandat të dytë. Duket se edhe kjo garë ka për të qenë thuajse formale pas përçarjes së opozitës. Fillimisht në primare hyri Niko Shupuli, por ai u tërhoq papritur. Në finale grupimi i Foltores i mbështetur nga Sali Berisha nxori si kandidat Edmond Kominon. Por nuk përjashtohet edhe skenari që Niko Shupuli të regjistrohet si kandidat i fraksionit të vulës në PD, grupimit të Alibeajt e Bardhit të mbështetur nga Lulzim Basha. ©argjiroja.net
