Ministri i Punëve të Brendshme, Besfort Lamallari, hodhi poshtë sot lajmet e publikuara në disa portale që pretendonin se ai kishte dhënë dorëheqjen.
Gjatë vizitës që zhvilloi në Berat për inaugurimin e ambienteve të reja të Drejtorisë Vendore të Policisë dhe Komisariatit të Policisë, Lamallari u pyet nga gazetarët rreth këtyre zërave por zgjodhi të përgjigjej shkurt.
“Unë nuk merrem me portalet, unë merrem vetëm me punë konkrete. Ky takim ku jemi sot është pjesë e punës së qeverisë shqiptare, ku edhe unë bëj pjesë” tha Lamallari.
Ministri, i shoqëruar nga drejtori i Përgjithshëm i Policisë së Shtetit, Skënder Hita, inspektoi godinën e re, një investim i qeverisë shqiptare me vlerë 253 milionë lekë.
“Ky është një investim me impakt të madh social. Në fund të ditës, gjithçka bëhet për t’u garantuar qytetarëve një trajtim sa më dinjitoz dhe një shërbim sa më cilësor. Synimi ynë është të forcojmë besimin e qytetarëve te Policia e Shtetit, sepse siguria ndërtohet përmes bashkëpunimit,” deklaroi Lamallari.
Sipas Lamallarit, ambientet e reja përmirësojnë kushtet e punës për efektivët, por edhe cilësinë e shërbimit për qytetarët.
“Janë ambiente absolutisht bashkëkohore, një investim i qeverisë shqiptare që ofron komoditet dhe dinjitet për punonjësit e Policisë së Shtetit. Por theksi ynë mbetet tek bashkëpunimi me qytetarët dhe trajtimi i tyre me etikë, mirësjellje dhe respekt në çdo shërbim që marrin,” u shpreh ai.
Lamallari tha se hapësirat e pritjes, shoqërimit dhe intervistimit të të miturve janë ndërtuar sipas standardeve ndërkombëtare për të drejtat e njeriut dhe në përputhje me rekomandimet e Avokatit të Popullit.
Ai vlerësoi gjithashtu situatën e sigurisë në qarkun e Beratit, duke e cilësuar atë si një nga zonat që spikat për rendin dhe qetësinë publike. Sipas tij, siguria është një faktor i rëndësishëm për zhvillimin e turizmit dhe ekonomisë.
“Turizmi zhvillohet kur kemi më shumë siguri, më shumë bashkëpunim dhe më shumë besim të qytetarëve te Policia e Shtetit. Kjo është prioriteti ynë,” tha ai.
Ministri bëri të ditur se gjatë takimit u diskutuan edhe masat për sezonin turistik, përfshirë zbatimin e ndryshimeve në udhëzimin e përbashkët për zhurmat, me synimin për të garantuar një mjedis më të qetë për qytetarët dhe vizitorët.
Lamallari tha se me këtë investim përmbyllet cikli i investimeve në drejtoritë vendore dhe komisariatet e Policisë së Shtetit në të gjithë vendin, duke shtuar se qeveria ka investuar jo vetëm në infrastrukturë dhe teknologji, por edhe në përmirësimin e kushteve për efektivët.
