Gjykata e Tiranës ka vendosur lirimin e Niko Qarkaj, një nga protestuesit e ndaluar pas protestës së zhvilluar para Kuvendit, duke e nxjerrë atë nga çdo masë sigurie për mungesë provash.
Qarkaj ishte arrestuar pas përplasjeve të raportuara gjatë protestës së të enjtes, e cila u shoqërua me tensione dhe ndërhyrje të forcave të rendit. Ai ishte mes personave të akuzuar për prishje të qetësisë publike, shkatërrim prone dhe kundërshtim të punonjësve të Policisë.
Pas lirimit nga ambientet e Komisariatit nr. 3, ku ishte pritur nga dhjetëra mbështetës, i riu u ngjit në kangjellat e hyrjes dhe nxorri një vezë nga xhepi, të cilën e hodhi në oborrin e komisariatit, duke deklaruar: “Kjo ishte arma ime”.
Sipas mbështetësve të tij, gjatë ndalimit ai ka pretenduar se është përballur me trajtim të ashpër nga policia dhe se ka pësuar kriza epilepsie, pretendime që janë përmendur edhe gjatë seancës gjyqësore, ku është raportuar një episod i ngjashëm shëndetësor.
Gjykata ka vlerësuar se nuk ka prova të mjaftueshme për vijimin e masës së sigurisë, duke urdhëruar lirimin e tij të menjëhershëm.
Ngjarja ka vijuar të shkaktojë reagime në rrjet dhe në mesin e protestuesve, të cilët e kanë pritur vendimin me thirrje mbështetëse jashtë godinës së ndalimit.
