Magazina ku u gjetën rreth 12 ton drogë në Përmet, ndodhet në një zonë të thyer, pranë një gryke mali.
Burime thonë se para dy muajsh magazina është kontrolluar nga policia në prani edhe të personit që administron objektin, i cili ka firmosur në procesverbal dhe nuk është gjetur lëndë narkotike.
Droga mund të jetë transportuar nga zonat përreth, por edhe nga Korça dhe Skrapari, nga frika e kontrolleve të policisë.
Ndërkohë, policia ka shpallur në kërkim personin që administron magazinën, së bashku me katër persona të tjerë, të cilët dyshohen si posedues të lëndës narkotike. Deri më tani identiteti i tyre nuk bëhet me dije.
Pak orë pas aksionit masiv të Policisë së Shtetit dhe SH.Ç.B.A, u krye peshimi i lëndës narkotike, duke kapur shifrën rekord prej 11 ton e 850 kg e futur në 450 thasë.
Kjo është sasia më e madhe e drogës së kapur ndonjëherë e magazinuar.
Në Operacionin masiv të policisë morën pjesë Antidroga, Forca e Posaçme Operacionale, Drejtoria e Policisë Gjirokastër, Sh.Ç.B.A dhe Policia e Përmetit.