Mbi 17 mijë fëmijë të vrarë në Gaza! Njihuni me disa prej ëndrrave që nuk do realizohen kurrë

“Gaza po bëhet një varrezë për fëmijët,” paralajmëroi Sekretari i Përgjithshëm i OKB-së, António Guterres, më 6 nëntor 2023, një deklaratë që u kundërshtua ashpër nga Izraeli dhe u konsiderua e ekzagjeruar nga mediat dhe opinioni publik izraelit.
Por që prej asaj kohe, sipas Ministrisë së Shëndetësisë në Gaza, 17 mijë e 121 fëmijë janë vrarë në konflikt, deri më 15 qershor 2025. Mes tyre janë 937 foshnja nën 1 vjeç, 4 mijë e 517 fëmijë nga 1 deri në 5 vjeç, 6 mijë e 325 të moshës 6–12 vjeç dhe 5 mijë e 342 adoleshentë 13–17 vjeç. Shifrat konsiderohen pothuajse të paprecedentë për përmasat e popullsisë dhe kohëzgjatjen e luftës, raportohet në Haaretz.
Në javët para përshkallëzimit të tensioneve me Iranin, media izraelite nisi t’i raportonte këto shifra më hapur, nën presionin e vëmendjes globale. Por lufta me Iranin i shtyu sërish në plan të dytë diskutimet për civilët në Gaza.
Ushtria izraelite këmbëngul se vepron në përputhje me të drejtën ndërkombëtare dhe bën përpjekje për të shmangur viktimat civile.
Mes viktimave janë dhjetëra vëllezër, motra dhe binjakë, dhe historitë e tyre personale e bëjnë të pamundur të mos kujtohet paralajmërimi i Guterres, bërë më shumë se 600 ditë më parë.
Në foto janë binjakët Ayser dhe Aysal Abu al-Qumsan, të cilët u vranë në Deir al-Balah më 13 gusht 2024, vetëm 4 ditë pas lindjes.
Awni Eldous, 12 vjeç, u vra në Gaza më 7 tetor 2023. Ai ëndërronte të kishte një milion ndjekës në Youtube.
Youssef Abu Moussa, 7 vjeç, u vra në Khan Yunis më 15 tetor 2023. Ai u vra teksa po shihte filma vizatimorë me vëllain e tij.
Binjakët Wissam dhe Naeem Abu Anza, 5 muajsh, të vrarë në Rafah më 3 mars 2024. Rania Abu Anza mbeti shtatzënë vetëm pas 12 vitesh dhe tre raundeve të trajtimit të fertilitetit, por lufta shkatërroi gjithçka të saj.
Vëllezërit Mazen dhe Ahmed Abu Assi, 17 dhe 13 vjeç, të vrarë pranë Spitalit Al-Ahli më 17 tetor 2023. Një shpërthim pranë Spitalit Al-Ahli në Gaza, ku shumë civilë të zhvendosur ishin strehuar, vrau dy vëllezërit.
Tariq dhe Reem Badwan, 5 dhe 3 vjeç, të vrarë në kampin e refugjatëve Nuseirat më 22 nëntor 2023. Kur filloi lufta, babai i Reem dhe Tariq ishte në Egjipt dhe nuk mund të kthehej në Gaza. Fëmijët dhe nëna e tyre kërkuan strehim në shtëpinë e gjyshit të tyre, Khaled al-Nabhan, në kampin e refugjatëve Nuseirat.