Ka përfunduar raundi i parë i regjistrimeve për shkollat e larta. Në Universitetin ‘Eqrem Çabej’ Gjirokastër janë regjistruar rreth 150 studentë, një shifër shumë më e ulët krahasuar me një vit më parë. Numrin e konfirmon zv.rektori i këtij universiteti, Jani Dine, gjatë një interviste për Tv Gjirokastra. Ai thotë se kanë shpresë që gjatë raundit të dytë të aplikimeve, numri i studentëve të rritet. Përtej optimizmit të zv.rektorit, në fakt projeksionet janë që këtë vit akademik numri i studentëve të rinj në Universitetin e Gjirokastrës të reduktohet edhe më. Vit pas viti ky institucion i arsimit të lartë ka njohur rënie.
ArgjiroLajm.net publikoi dy javë më parë një analizë të thelluar, përmes së cilës dhamë këndvështrimin tonë se përse është rrënuar ky universitet dhe kush po e mban peng. Ndonëse nuk kishim përmendur nominalisht askënd, gjë që do ta bëjmë në vijim, sidomos kur të flasim për lidhjet e frikshme nepotike, për fat të keq shkrimi u interpretua si sulm i qëllimshëm ndaj universitetit. U interpretua vetem tek një pjesë e trupës akademike, sekserëve dhe batakçinjve që e përdorin atë institucion për t’u pasuruar. Pjesa dërrmuese e atyre që e lexuan, rreth 7 mijë vetë, sigurisht që ndanin të njëjtin qëndrim me ne, përfshi këtu edhe ish drejtues dhe lektorë të shquar të universitetit, të cilët dërguan mesazhe inkurajuese tek ne për nxitjen e një debati që ndihmon në reformimin e këtij institucioni.
Ata që varën turinjtë ishin sekserët dhe batakçinjtë, që duan të ruajnë status-quonë. Me urdhresa të brendshme u mobilizuan në shpërndarjen e një shkrimi tjetër që kishte zbuluar konspiracionin e madh, se gjoja artikulli ynë ishte sponsorizuar nga Henri Çili për të shkatërruar Universitetin e Gjirokastrës. Është fiks strategjia e hajdutëve të zënë me presh në duar dhe që kur s’kanë nga t’ja mbajnë shpikin armikun imagjinar, kërkojnë fajin diku tjetër. Banaliteti shtohet më tej kur mëson se në armatën e të mobilizuarve ishte edhe një anëtar-lolo i Këshillit Bashkiak Gjirokastër, që e marrin për hundësh duke i diktuar kapërcimet sa nga njëra parti në tjetrën. Le më pastaj gjysmë-drejtoreshën që e zuri frika për burrin pedagog se mos ia përfshimë në atë listën e emërimeve nepotike. ‘Qershia mbi tortë’ ishte një burrë tjetër i shkurtër, thagmat e të cilit i di gjithë Gjirokastra.
Për këto dhe gjithë të tjerat me radhë do të flasim një moment tjetër. Dallimi mes nesh dhe jush është i madh, ndaj i varët turinjtë pas shkrimit tonë. Ne e duam universitetin aty ku i takon një universiteti të jetë, ndërsa ju e shikoni si ‘lopë’ për ta mjelë. Ne e duam të reformohet për të ndaluar rrënimin e mëtejshëm, ju doni të bëni sikur çdo gjë është brenda normalitetit mjafton që ofiqet tuaja të mos preken. Jemi dy botë të ndryshme! Vazhdoni ngushëlloni veten me teoritë konspirative që sajojnë dështakët pas frëngjive të Facebook. Sikur Eqrem Çabej të ishte gjallë dhe t’ju shihte, me siguri që do të kishte thënë: Zot, mos i fal sepse e dinë çfarë bëjnë!
© ArgjiroLajm.net
