Dom Gjergj Meta ka reaguar në lidhje me propozimin e kryeministrit Edi Rama për masa deri në mbylljen e rrjeteve sociale TikTok dhe Snapchat, pas ngjarjes tragjike të ndodhur më 18 nëntor, ku 14-vjeçari, Martin Cani ndërroi jetë pasi u qëllua e thikë nga bashkëmoshatari i tij pranë shkollës Fan Noli në kryeqytet.
Ai flet për një rini që një pjesë e tyre janë si banorë dixhitalë, dhe për të kemi një brez që tejkalon nga kjo pikëpamje brezin e prindërve. Kërkesën e kryeministrit ai thotë se e ka parë me një këndvështrim pozitiv, dhe se me atë deklaratë ka marrë përgjegjësi institucionale.
”Ndërhyrjen e kryeministrit e pashë edhe si një akt përgjegjësie, por mbetet për tu parë sesi do të realizohet kjo gjë sepse në ide themi që të bëhet kështu, apo ashtu, por si duhet bërë. Duhet të mbështesim institucionet që merren me këto, një konsultim i gjerë me prindërit, por unë nuk do të përjashtoja nga konsultimi edhe adoleshentët. Ndodh një gjë që ne nuk e kuptojmë, por që në një moment edhe ata vetë lodhen, dhe nuk dinë që të shtrijnë dorën për të kërkuar ndihmë. Duhet të flasim me ta”.
