Sot është një ditë e rëndësishme për drejtësinë.
Gjykata do të shqyrtojë dy kërkesa të rëndësishme: Atë të Ilir Metës dhe Erion Veliajt, për t’u liruar nga burgu.
Kërkesa e Metës ishte parashikuar të shqyrtohej të hënën, por është shtyrë për një ditë më vonë (ndoshta me qëllim).
Nuk dihet se çfarë vendimi do të merret për dy politikanët e rëndësishëm që ndodhen në burg, por e nesërmja mund të konsiderohet si një ditë zjarri për drejtësinë.
Dhe një provë, që mund të rezultojë fatale për drejtësinë, nëse merr vendimet e gabuara.
Vendimet për Metën dhe Veliajn janë një thikë me presë për gjykatën, pasi si lënie e tyre në burg, ashtu edhe një lirim i mundshëm, do të shkaktonin debate të forta.
Nëse Meta dhe Veliaj do të mbeteshin në burg, do të kishim debatet e zakonshme se këto vendime janë të pakuptimta, pasi tashmë provat për ta janë administruar dhe nuk kanë se çfarë të prishin.
Nëse do të liroheshin nga burgu, debati atëherë do të ishte edhe më i nxehtë, pasi në publik do të perceptohej si një dorëzim i drejtësisë para politikës.
Ndaj dhe dita e sotme, konsiderohet si një provë zjarri për drejtësinë, e cila prej kohësh është vënë në qendër të kritikës dhe sulmeve.
Herë për vendimet e saj e herë për debate që nuk kanë shumë lidhje me drejtësinë, siç është ai për pagat, që po zhvillohet prej disa ditësh dhe që po përdoret nga politika për denigrimin e gjyqtarëve.
