Sa herë të rrëmosh, do gjesh gjithnjë diçka të re në historinë e pasur të një qyteti 2 mijë vjeçar si Gjirokastra. Qyteti antik i Antigonesë, Adrianopolit, varret ilire, dhe mjaft monumente të tjera përfshi këtu edhe kultet fetare shekullore mund të konsiderohen ende të pa eksploruara apo të zbuluar vetëm pjesërisht. Koha i mvesh ato me një mister që askush duket se ka dijet e nevojshme për t’i zbuluar.
Profesioni i arkeologut apo restauratorit janë drejt shuarjes në qytetin e gurtë. Tanimë është bërë mëse e zakonshme që për çdo mision arkeologjik, nga lugina e Drinos e deri në Lekël të Përmetit, specialistët e fushës të vijnë nga Tirana. Të rinjtë e sapodiplomuar nuk kthehen në vendlindje, ndërsa arkeologjia nuk është në krye të listës së preferencave dhe për ata që zgjedhin të vijojnë studimet e larta.
Ndarja nga jeta para kohe e Vladimir Qirjaqit ishte një humbje e madhe, jo vetëm në kuptimin njerëzor, por dhe atë profesional, pasi i ndjeri la pas një hendek të madh në lëmin e arkeologjisë. Të ndërgjegjshëm për emergjencën e krijuar, ministria e kulturës është duke parë mundësinë e bashkëpunimit mes Universitetit “Eqerem Çabej” dhe institucioneve përkatëse në Tiranë. Një nisëm që ende nuk është konkretizuar.
