Pas suksesit në Sprint, Mark Markez është rikthyer te fitorja në Çmimin e Madh të Muxhelos pas 11 vitesh. I nisur nga “pole position”, pasi kishte fiksuar kohë rekord për pistën, piloti italian i Dukatit mbylli dje një fundjavë perfekte në Itali, duke shënuar triumfin në ndalesën e nëntë sezonale të kampionatit.
23 xhiro emocionuese me parakalime dhe kundërparakalime, mes vëllezërve Markez dhe Peko Banjajas, ndërsa në fund festa i takoi tetë herë kampionit të botës. Një betejë e bukur, e shoqëruar edhe me disa kontakte të lehta mes dy pilotëve të Dukatit zyrtar, ndërsa më tej Markez e konsolidoi kreun, duke shkuar drejt fitores në tokën italiane, në një pistë që historikisht ka vuajtur. Në vend të dytë u klasifikua Aleks Markez (Gresini), ndërsa Banjaja nuk mundi të mbante pozicionin e tretë, teksa u kalua në xhiron e parafundit nga bashkëkombësi i tij, Fabio di Xhanantonio (VR46).
Kjo ishte fitorja numër 93 në karrierë për Mark Markez, duke i përfshirë të tria kategoritë, me pilotin spanjoll që i forcon edhe më shumë pozitat e tij si lider i kampionatit, duke e thelluar diferencën më ndjekësit. Me Banjajën të katërtin, pesëshja e parë në garën e djeshme në Muxhelo u plotësua nga Marko Bexeki (Aprilia). Më tej, sipas radhës me Franko Morbidelin (VR46) në vend të gjashtë, top-10 u kompletua nga Raul Fernandez (Aprilia Trackhouse), dy KTM-të Red Bull të Pedro Akostës dhe Bred Binderit, si dhe Ai Ogura (Aprilia Trackhouse).
POLEMIKAT
Ndonëse në pistë gjithçka shkoi në perfeksion për Mark Markezin, në tribuna ai nuk u prit mirë nga publiku italian. Duke mos i harruar përplasjet e së shkuarës me idhullin e tyre, Valentino Rosin, tifozët e vërshëllyen spanjollin. Momente tensioni që sollën edhe ndërhyrjen e menaxherit të Dukatit, Davide Tardoci. Ky i fundit iu drejtua kështu publikut në zonën qendrore të tribunës: “Pushoni! Tani është u kuq”, duke evidentuar ngjyrat që mbron Mark Markez si pilot i Dukatit zyrtar.
PROTAGONIST
Duke u kthyer te Mark Markez, protagonist i garës në Muxhelo dhe i këtij sezoni në Moto GP, spanjolli e komentoi kështu suksesin e arritur në Itali: “Ndjesi fantastike me motorin. Sot, Dukati im nuk ishte i kuq, por sërish përfaqësonte shpirtin e ekipit tonë. Ky është një podium shumë i veçantë, jam super i lumtur. Do të doja t’i kisha menaxhuar gomat që nga fillimi, ishte plani im ideal, por Aleksi dhe Peko më vështirësuan. Megjithatë, isha mjaft i qetë. Isha pak i kujdesshëm në atë fazë, pastaj kur Aleks vazhdoi të shtynte përpara, i thashë vetes se aty ishte fillimi i vërtetë i garës. Në garë pista ishte kritike, nuk e di pse. Pasi isha në krye, bëra ikjen dhe ia dola. Megjithatë, mendoj se nëse Aleksi, Peko apo Di Xhanantonio do të më kishin arritur, nuk do të kisha bërë asgjë të çmendur, sepse ishte shumë e rëndësishme të përfundoja garën. Kjo fitore është kurorëzimi i një fundjave të shkëlqyer”, deklaroi Markez. Ndalesa e radhës e kampionatit do të jetë këtë fundjavë në Holandë.
