Mark Markez ka zbuluar përmes disa fotografive gjendjen fizike të krahut të tij të djathtë, i cili vazhdon të jetë një nga shqetësimet kryesore në karrierën e tij në MotoGP.
Piloti spanjoll publikoi në “Instagram” disa imazhe dhe një video nga stërvitja në shtëpi, ku dallohet qartë diferenca mes krahut të djathtë dhe atij të majtë. Problemet me krahun u rikthyen në vëmendje pas eventit të Britanisë, ku Markez pranoi se gjatë garës nuk kishte pasur kontroll të plotë mbi krahun e djathtë. Gjendja e krahut ndikon në mënyrën se si Markez menaxhon motorin, veçanërisht në kthesat djathtas.
Për këtë arsye, ai paraqitet më mirë në pistat me më shumë kthesa majtas, megjithëse talenti i tij natyral vazhdon të bëjë diferencën. Markez po punon intensivisht për të forcuar krahun dhe synon të luftojë për titullin. Sfida e radhës është Misano, një pistë ku spanjolli ka pasur rezultate të mira dhe ku do të vazhdojë betejën për objektivin e madh: titullin e dhjetë kampion bote.
