Man.United gjen shpëtim në Champions, në një sfidë ku dolën me 3 pikë pas një përmbysje të “çmendur” përballë Romës. Pas 3 humbjeve radhazi, mes Champions dhe Premier League, një ecuri shumë negative që vendosi në dyshim të fortë të ardhmen e trajnerit Carrick, “djajtë e kuq” triumfuan 3-2 në “Old Trafford”. Në fakt, tifozët e pranishëm përjetuan makthe në fillim pasi ekipi i Gasperinit realizoi dy gola të shpejtë brenda 17 minutash.
Fillimisht ishte Soule që realizoi golin e parë në minutën e 11-të me një goditje të bukur brenda në zonë. 6 minuta më vonë, Roma fitoi një penallti dhe nga pika e bardhë Malen u tregua i saktë duke dyfishuar shifrat.
Situata ndryshoi totalisht në fraksionin e dytë, ku Bruno Fernandez ngushtoi fillimisht shifrat në 1-2 në minutën e 58-të pas tentativës së dytë nga 11 metra distancë. Stafetën më pas e mori Cunha, me brazilianin që barazoi shifrat në 2-2 në minutën e 83-të. Cunha përsëriti veten 3 minuta më vonë duke realizuar një gol shumë të bukur, i dyti personal dhe i treti për Man.United, një gol jashtëzakonisht i rëndësishëm që solli festë në “Old Trafford”. “Djajtë e kuq” bënë gjithçka për të mbrojtur këtë fitore që i vendos provizorisht në vendin e 17-të në kuotën e 6 pikëve, 2 më shumë se sa Roma.
Shijon këtë fitore të madhe trajneri Carrick: “Jam jashtëzakonisht shumë krenar për lojtarët, merita është e tyre që arritën të kalonin një moment shumë të vështirë. Në pjesën e dytë zbritën në fushë me sjelljen e duhur, por kjo është thjesht një fitore, nuk duhet të kalojmë në eufori”, u shpreh Carrick.
