Hoswi është një nga të mbijetuarit e tërmetit që tronditi Sirinë dhe Turqinë. Ai jetonte në Sirinë veriperëndimore me familjen e tij kur shtëpia e tij u shkatërrua. Tani duke treguar një grumbull rrënojash ai thotë: Kjo është shtëpia jonë që na ra mbi ne. Na ra e gjithë ndërtesa, por falë Zotit dolëm të padëmtuar.
Ai dhe familja e tij, si shumë të tjerë në zonë, ata ishin mbeti pa asgjë dhe, në një video të Save The Children, ai flet për situatën në të cilën ndodhet.
“Gjërat tona kanë mbaruar, uji, ushqimi, gjithçka na ka mbaruar. Dhe tani qëndrojmë në kamp. Jemi ftohtë pa rroba, pa ngrënë dhe pa pije. Dje binte borë dhe shi dhe e gjithë familja ishte jashtë në të ftohtin e acartë. Nuk ka ngrohje, rroba apo çfarëdo.”
Po ashtu, ai tregoi edhe momentet e tmerrshme të tërmetit: Ndjemë se shtëpitë po dridheshin, ata që ia dolën të shpëtonin, ikën, të tjerët vdiqën! Shpëtuam vetëm shpirtin, e vetmja gjë që kemi janë rrobat që kemi veshur, çdo gjë tjetër na ka humbur.
Dita e katërt e kërkimeve për personat që ndodhen nën rrënojat në Turqi dhe Siri. Tërmeti shkatërrues i së hënës la pas mbi 17 mijë viktima. Në Siri, numri i përgjithshëm i viktimave është 3,162, duke përfshirë 1,900 në zonat e kontrolluara nga rebelët në veriperëndim. Rreth 1,262 vdekje janë regjistruar në pjesët e kontrolluara nga qeveria të vendit. Në Turqi, numri është rritur në të paktën 12,873. Agjencitë e ndihmës kanë paralajmëruar se numri ka të ngjarë të rritet ndjeshëm, veçanërisht në Siri, pasi ekipet e kërkimit dhe shpëtimit kalojnë nëpër rrënojat e mijëra ndërtesave të shembura mes kushteve të motit të ngrirë, përballë rrezikut të pasgoditjeve. Dhjetëra mijëra njerëz janë raportuar të plagosur në të gjithë rajonin. Shtete të ndryshme, BE dhe organizata të ndryshme kanë dërguar ndihma, në vlera monetare dhe në forca kërkimi.