Nuk ndalet marshimi i New York Knicks në play-off-et e NBA-së. Skuadra nga Nju Jorku fitoi edhe ndeshjen e tretë ndaj Cleveland Cavaliers me rezultatin 121-108 në Rocket Arena, duke kaluar në avantazhin 3-0 në seri dhe duke hedhur një hap të madh drejt finales së NBA-së. Në historinë e ligës, asnjë skuadër nuk ka arritur të përmbysë një disavantazh 0-3 në seri.
Skuadra e drejtuar nga Mike Brown e nisi sfidën në mënyrë perfekte me një seri 9-1 dhe e mbylli periodën e parë në avantazh 37-27, falë një performance të shkëlqyer në sulm me 12 goditje të sakta nga 17 tentativa.
Knicks ruajtën kontrollin e ndeshjes pothuajse gjatë gjithë kohës, ndërsa Cavaliers arritën vetëm një barazim të përkohshëm 50-50 në periodën e dytë. Në pjesën e dytë, ritmi dhe dominimi i miqve vazhdoi, me Jalen Brunson që udhëhoqi një seri 8-1 për ta çuar rezultatin në 83-70 në fund të periodës së tretë.
Në periodën e fundit ishte Landry Shamet ai që vulosi suksesin me tri goditje radhazi për tre pikë, duke i dhënë Knicks avantazhin +14 në 105-91 dhe duke i afruar ndjeshëm bluarinjtë me finalen e madhe të NBA-së.
