Turqia dhe Greqia kanë rënë dakord për të nisur bisedimet për zgjidhjen e mosmarrëveshjeve të tyre mbi Mesdheun Lindor. Lajmin e bën të ditur sekretari i Përgjithshëm i NATO-s, Jens Stoltenberg, sipas të cilit dy anëtarët e organizatës, do të zhvillojnë bisedime për të shmangur konfliktin ushtarak dhe për të ulur rrezikun e incidenteve në Mesdhe.
“Pas diskutimeve të mia me udhëheqësit grekë dhe turq, të dy Aleatët kanë rënë dakord të hyjnë në bisedime teknike në NATO për të krijuar mekanizma për de-konflikt ushtarak për të zvogëluar rrezikun e incidenteve dhe aksidenteve në Mesdheun Lindor.
Greqia dhe Turqia janë aleatë të vlerësuar dhe NATO është një platformë e rëndësishme për konsultime për të gjitha çështjet që prekin sigurinë tonë të përbashkët. Jam në kontakt të ngushtë me të gjithë Aleatët e interesuar për të gjetur një zgjidhje për tensionet në frymën e solidaritetit të NATO-s”, shkruan Stoltenberg në mesazhin e shpërndarë.