Në muajin mars të këtij viti, ArgjiroLajm.net raportoi për emërimin që Zamira Rami i bëri Benard Pollos si administratori i Lazaratit. Pollo është njëkohësisht edhe kryetari i PD Lazarat. Sipas nesh ky emërim vinte në kuadër të koalicionit opozitar mes PD-së dhe LSI-së, por të nesërmen Partia Demokratike Gjirokastër reagoi përmes një deklarate, ku e mohonte që të kishte marrëveshje apo koalicion mes dy partive. Sipas saj, emërimi i Benard Pollos ishte thjesht një zgjedhje perosonale e Zamira Ramit. Kuptohet që PD nguron të thotë se është në një koalicion me LSI-në dhe se duan të vijnë bashkë në pushtet, pasi gjerësisht elektorati i saj i djathtë nuk e përkrah këtë zgjedhje. Por sot, pas zhvillimeve në Këshillin Bashkiak, Roland Bejko e tha publikisht se ka një koalicion, një marrëveshje me LSI-në, në emër të së cilës bëhen lëvizjet në këtë këshill dhe synohet marrja e drejtimit të Këshillit të Qarkut.
‘Këto vendime u morën në kuadër të ndryshimit të raporteve në Këshillin Bashkiak, ku tashmë shumicën e përcakton koalicioni le të themi ose marrëveshja midis PD-së dhe LSI-së. Nuk ka patur asnjë arsye tjetër përtej kësaj’, tha Bejko para mediave. Më poshtë deklarata e PD Gjirokastër në muajin mars, ku e mohonte koalicionin me LSI-në dhe zotohej se nëse do të kishte marrëveshje ajo do të bëhej publike në të gjithë termat e saj, si dhe video e prononcimit të sotëm të Roland Bejkos, që thotë të kundërtën.
© ArgjiroLajm.net
