Florian Taci, drejtori i Hipotekës në Gjirokastër u shndërrua gati në një ‘pop star’ gjatë dëgjesës së Ramës me banorët në Grapsh dhe në Pallatin e Sportit. Para kamerave dhe në sy të kryeministrit disa qytetarë e vlerësonin shumë punën e tij në atë institucion.
Por jo çdo gjë shkoi mirë për Tacin, pasi në panairin e punës u gjend dikush që iu ankua Ramës për një problem me Hipotekën në Gjirokastër. Një sipërmarrës i tha Ramës së kërkon të zgjerojë aktivitetin e tij, duke shtuar kështu edhe vende të reja pune, por që ka pengesë nga Hipoteka për shkak se nuk ka mbërritur nga Tirana harta dixhitale e zonës edhe pse e ka marrë lejen e ndërtimit. Pra, nuk i jepet leje shfrytëzimi nga Hipoteka sepse s’ka mbërritur harta dixhitale.
‘Këta janë gati, e kanë të tyre, tani Hipoteka thotë s’më ka ardhur harta dixhitale. Një absurditet, kanë marrë leje ndërtimi, tani i thotë Hipoteka s’kam hartë. Thuaj atij ta zgjidhi këtë punë, urgjent’, i është drejtuar Rama deputetit Bledi Çuçi, duke i kërkuar që t’ja përcjellë porosinë drejtorit të Hipotekës, Florian Taci.
Ndërsa sipërmarrësit i është drejtuar me fjalët: ’Mbaje numrin tim të telefonit. Në 30 maj do më çosh mesazh, u bë apo s’u bë, kaq. Asnjë fjalë tjetër’. Shihni videon më poshtë. © AgjiroLajm.net
