Ish-deputeti i Gjirokastrës, që ende sot s’ka thënë dy fjalë për thirrjet antishqiptare në Bulart gjatë varrimit të ekstremistit Kostandin Kacifas, qenka shumë i shqetësuar pse Prokuroria e Krimeve të Rënda ka rihapur hetimet për masakrën e Peshkëpisë. Vangjel Tavo që dëgjoi thirrjet “sqepar dhe zjarr për qentë shqiptarë” dhe nuk gjeti kohë për t’i dënuar ato thirrje, sot na tregon se minoritetit grek në Shqipëri po i bëhet presion me rihapjen e hetimeve për masakrën e Peshkëpisë. Zoti Tavo, minoriteti grek në Shqipëri është vlerë e shtuar për shtetin shqiptar dhe gjithë kohës kemi jetuar në harmoni.
Ky minoritet s’ka lidhje me një tufë terroristësh që sulmuan asokohe repartin ushtarak në Peshkëpi ku mbeten të vrarë dy ushtarë shqiptarë. Minoriteti grek s’ka lidhje as me ekstremistin Kostandin Kacifas, i cili mori atë përgjigje që kërkoi vetë me marrëzinë e tij. Reagimi juaj i sotëm kuptohet që është për retorikë politike. Edhe thjesht për ta mbajtur shënim si reagim ata njerëz që mbajnë zakonisht shënime të tilla dhe ti e di shumë mirë këtë gjë.
Nëse Fredi Beleri është i përfshirë në masakrën e Peshkëpisë do ta vendosë drejtësia shqiptare dhe ju nuk jeni askush që ta pengoni këtë proces. Përkundrazi një hetim të tillë ju duhet ta inkurajoni. Për Fatmir Shehun dhe Arsen Gjinin duhet dhënë drejtësi. Kjo s’ka lidhje me minoritetin, aq më keq të jetë presion apo diversion sic thoni ju. Mos e ngatërroni minoritetin në Dropull me një tufë horrash e terroristësh që të ngërthyer nga nacionalizmi bënë masakrën e Peshkëpisë.
Aman o burrë, më mirë mbaje gojën mbyllur kur s’ke për të thënë gjë se sa të thuash broçkulla të tilla. Lere të paktën një fije respekti tek elektorati i Gjirokastrës që të ka mbajtur në Kuvend për më shumë se 20 vite. Mos ji palë me terroristët dhe nacionalistët që fërkojnë duart për trazira.
Më poshtë reagimi i plotë i Vangjel Tavos.
25 vite më vonë rikthehet çështja e Masakrës së Peshkëpisë. Ditët e fundit Prokuroria e Krimeve të Renda po thërret në pyetje disa pjesëtarë të minoritetit etnik grek. Përse tani?
Kriza e brendshme në vend kërkon diversion duke e zhvendosur vëmendjen në kurriz të minoritetit grek? A po përdoret drejtësia nga qarqe të caktuara politike? Minoriteti grek nuk mund të jetë kurrësesi as shënjestër dhe as rrugëdalje nga qoshsokaket e ngushta politike. Ky është një terror artificial dhe një shpresë për kundërvënie etnike. Njëri kah politik mund të dëshirojë prishjen e harmonisë politike por nuk duhet të gjejë shpëtimin duke u përpjekur të zhbëjë harmoninë dhe bashkëjetesën etnike. Drejtësia të qëndrojë larg orientimit politik dhe të mos bëhet vegël e saj. Harmonia dhe bashkëjetesa etnike ka prevaluar ndër shekuj, e do prevalojë edhe ndaj këtyre përpjekjeve artificiale të ditëve të fundit.
